පහන් තරුව අද්දර සිට ලියමි

 ඉතින් සමාවෙන්න නිතර නොලිව්වාට බ්ලොග් එක....

මීට මාස දෙකකට කලින් ලංකාවේ අඩු ආදායම් පවුල්වලට සෝලා පැනල හරි ගහලා දෙමුද කියලා පෝස්ට් එකක් මම ලිව්වා මතක ඇති....

අපිට තනිව බොහෝ දේ කරන්න නොහැකි වුණත් කණ්ඩායම් වශයෙන් බොහෝ දේවල් කළ හැකියි

ඒක මම වැඩ කළ හැම තැනකදීම අත් දුටු සත්‍යය.

මේක ඔයාගෙ රාජකාරිය නොවෙයි ! ඒවා ගොඩ නංවන්න රජය දැනගන්න ඕනේ !

තමන්ගේ ඩියුටිය විතරක් බලාගන්න

ඔයා ඔහොම කරනකොට මිනිස්සු අපෙනුත් ඒවා බලාපොරොත්තු වෙනවා.

විහින් මැරුම් කන්නේ නැතුව රාජකාරිය විතරක් කරන්න...

මේ මම සැරෙන් සැරේ අහගත්තු දේවල්.

මේ සියලු අවවාද ඇත්ත තමා. ඒත් මට මතක් වෙන්නේ ම හෝ ගානා පොකුණ චිත්‍රපටියේ ටීචර් ගේ දෙබසක් "මට බෑ ඒත් අපිට පුලුවන්!"

ලංකාව වගේ රටක මේ තරම් කඩා වැටීම් බහුල රටක මේ තරම් හරි ජීවිත බේරෙන්නේ වැඩ කටයුතු ඇදගෙන යන්නේ අන්න ඒ අපේ හිත්වල හයිය නිසා. මේ අපි නොකළ යුතු දේවල් වෙන්න හැකියි මේ අපේ රාජකාරිය නෙමේ වෙන්නත් පුළුවන්. ඒත් එහෙම කියලා බලන් ඉන්නත් බෑ.

ඉතින් ලංකා පොළොවෙන් සමුගනිද්දි තිබුණු රට පසුගිය මාස දෙක තුනේ ආර්ථික අහේනිය එක්ක අන්තයටම කඩා කෑලි විසිරී යනකොට මෙහෙ ඉඳන් අපි බොහෝ දෙනා හූල්ලමින් හිටියේ...

සෝලා පැනල හරි මිනිස්සුන්ට සවිකරලා දෙමුද කියලා ඒ ගැන වුණු කතාවේදී... මට පුද්ගලික පණිවිඩයක් එවලා තිබුණා විදේශ පුහුණුව ලබන තවත් වෛද්‍යවරියක වන චාපා අක්කා.

"නංගි මොනවා හරි කරනවානම් මාවත් එකතු කරගන්න... අපි මොනවා හරි කරමු නංගි. මම සතියකට දෙකකට සැරයක් ලංකාවේ රාජය බැංකු වලට විදේශ මුදල් දානවා මේ දකින දේවල් දරාගන්න බැරි නිසා."

අක්කා සහ මම නිතර කතා නොකළාට අපි හමුවුනේම ව්‍යසන වලදී වෛද්‍ය උදව් උපකාර දෙන්න... ගංවතුර කාලේ ස්වේජ්ජා වෛද්‍ය කඳවුරු ගණනාවක් කළ අපි ආයේ එකතුවුනා. ඒ කාලේ දීම ගංවතුර කඳවුරු නිසා එංගලන්තයේ ඉන්න ගත් කතුවර චන්දන අයියා අඳුන්වා දුන්න කමනිකා නංගිත් එකතුවුනා , සෝලා වැඩේ ගැන සංවාදයෙන් "මොනවා හරි කරමු" කියපු ළමා රෝහලේ අප්‍රමාණ ස්වේච්ඡා ආධාර වැඩ සටහන් කළ මනිල්කා අක්කත් එකතු වුනා.

අපේම මිනිසුන් ලංකා පොළොවේ ජීවත් වීම උදෙසා අරගලය දියත් කරද්දී.... ඒ මිනිසුන්ගේ හයියට මොකක් හරි කරන්න චාපා අක්කා දන්න යාළුවෝ අනුපමා අක්කා තනුෂා , මම දන්න යාළුවෝ සහ අපි එකිනෙකාගේ තවත් යාළුවෝ ලෙස එකතුවුන Heal Sri Lanka 2022 කණ්ඩායම වටේ දන්න හඳුනන නොදන්නා ගොඩක් දෙනෙක් එකතු වුණා.

අපිත් සසල වෙන ලංකා පොළොවේ ප්‍රවෘත්ති හමුවේ නොසැලී මොන ප්‍රශ්නෙ ආවත් අපි මේක කරමු කීවේ...වෛද්‍ය දම්මිනි.

අපි ඉතින් මූලික සාකච්ජාවලට එහෙම එක් රැස් වුණේ මිරිහානේ අරගලය පටන් ගන්න කලින් ....ලෝකය තනි යායක් කියලා මහගම සේකර ලීවා දේ සනාථ කරමින් zoom තාක්ෂණය ඔස්සේ දවසක් ඇර දවසක් මූණ ගැහෙමින් අපේ what's app සාමූහිකය තුළ නිරතුරුව පණිවිඩ හුවමාරු කරගනිමින් අපි ලැහැස්ති වුනා. මුලින්ම සෞඛ්‍ය අමාත්‍යාංශයේ පරිත්‍යාග අංශය බාර වෛද්‍යවරයා සමග සාකච්ජා කරලා අපි කවුද මොනවද කරන්නේ කියන එක ලිඛිතව දැනුම් දීලා ඒ ගැන අවශ්‍ය තොරතුරු දැනගෙන ඉන් පස්සේ අපි හෙව්වේ ඖෂධ රෝහල්වලටම ලබා දීමේ පිළිවෙල. ඒකත් යම් තරමකට නිරාවරණය කරගන්න හැකි වුණේ අපි සියල්ලෝම රජයේ රෝහල්වල වැඩ කර අත්දැකීම් සහ පිරිස් බලය ඒ කියන්නේ දැන හැඳුනුම් කම් වැඩි වැඩියෙන් තිබුණු නිසා.

ඖෂධ නැත කියා ඇහෙද්දි ඖෂධ ඇත කියා ප්‍රවෘත්ති මැවූ අය නිසාත් අවුලක් නැත නෑ ඒක වැරදියි අවුලක් ඇත කියමින් එක එක ප්‍රවෘත්ති නිවේදන ආ නිසා අපි අඩියක් පස්සට හෝ ඉස්සරහට ගන්න බැරුව හිටිය වෙලාවල් තිබුණා. අවශ්‍ය ලිපි ලේඛන ගැන උපදෙස් මීට කලින් මෙහෙම දේවල් කළ අය සහ විශේෂඥ වෛද්‍යවරුන්ගෙන් ලැබුණා. ඖෂධ ආයතන ගැන තොරතුරු හොයන්න bio medical engineer කෙනෙක් වන සජිත් නීලංජන මල්ලි උදව් කළා.

පවුම් තිස්දහසකට එහා මූල්‍ය ආධාර ගිණුම එක්ක ඒ හා සමාන අමතර කණ්ඩායම්වල පුද්ගලික දායකත්වය එක්ක heal Sri Lanka 2022 නොනැවතී ගමනේ.....

අප කෙරෙහි විශ්වාසය තැබූ සියල්ලන් මෙන්ම අප ට මේ දේවල් ලංකා පොළොවේ අවශ්‍යම තැන් හොයා ලබා දෙන්නටත්, ප්‍රමිතිය හා ගුණාත්මකභාවය ගැන එතන ඉඳන් අපේ නිරීක්ෂකයෝ වෙන්නටත් ස්වෙච්ඡාවෙන් මේ හැම රෝහලකම වෛද්‍යවරු, හෙදියන්, ඖෂධවේදීන් සහ රසායනාගාර තාක්ෂණික නිලධාරීන් උපකාර වුණා.

මෙතෙක් කළ පරිත්‍යාග සියල්ල සහ ඒ සඳහා දායක වූ ඔබ ගැන heal Sri Lanka 2022 පිටුවේ සඳහන් වෙනවා. ( https://www.facebook.com/Heal-Sri-Lanka-2022-103177539042249 ).

මට එදා ඉඳන් තිස්සෙම මතක් වෙන්නේ මම කාලයකට කලින් ලියූ මෙන්න මේ කවි පද පේලිය...

ලොකු වෙලා අපි මෙහෙම කරමුද

කතා කරගත් කාල මතකද

මහ පොළොව උඩ කරපු අරගල

අදත් හීනෙන් හිනාවෙනවද

අපිට කරගත් මොකුත් නැතුවට

අනුන් වෙනුවෙන් හුඟක් නැහුනට

හෙලූ දහඩිය මතක කඳුළක

නාඳුනන නම් ලියැවිලා ඇත

හිතන්නෙත් නැති වෙලාවක් අග

දරාගත් හොඳ දෝත බැඳගෙන

හදිසියේ ගත් හුස්ම නතරව

ජීවිතේ මඟ අතැර ගියොතින්

ඉහළ අහසේ වළාවක් උඩ

නතර වෙන්නට ඉසිඹුවක් ලැබ

පාත පෙනෙනා බොහෝ දේ ගැන

කතා වෙමු අපි වෙලා අරගෙන

ලංකා පොළොවේ වැඩ කළ අපිට මේ වචන ටික හරිම ළඟයි නේද ?

©බෝධිනී සමරතුංග

Heal Sri Lanka එකේ gofundme link එක තමා මේ

https://www.gofundme.com/f/7rr463-heal-sri-lanka?fbclid=IwAR1BTNbyjbshZ4_bUWlYX_WQYqAwh_9pmuRpTpIxJvGbiHCfJ45z2UVb-aI

මුලින් 20 000 අරමුණු කළ ද එය සති දෙකෙන් එකතු වූ නිසා අපි එය 40 000 දක්වා පරිත්‍යාග එකතු කරන්නට තබා තිබුනා.

එයත් මේ මාසයෙන් හමාර කරන්නටයි සූදානම. ‍‍පැවති අවදානම් තත්ත්වයට මදක් හෝ අස්වැසිල්ලක් සපයන්න මේ කරගෙන ගිය ක්‍රියාන්විතයෙන් යම් තරමකට උදව්වක් වුනා කියලා හිතනවා. ඒත් අපි මූලිකවම හිතන්න ඕනෙ මේ සමස්ථ රටක් දුර්වල වුණු... රටක් අකර්මණ්‍ය වුණු අදූරදර්ෂී ඛේදාන්තයක් වූ සිස්ටම් එක වෙනස් කරන්න. එතෙක් මේ ලෝකෙම එකතුවෙලා පරිත්‍යාග දුන්නත් රටට පැවැත්මක් හෝ හෙටක් නෑ.