මකරා ගල ...( dragon rock )

 මකරා ගල ..( dragon rock )

මේ මෑතක අපි කළ සංචාරයකින් පසුව ගත් පින්තූර සමග ලියන්නේ ඒ ගමන ගැන ලියන්න ය කියන ඉල්ලීම් නිසා

මේ ජර්මනියේ බොන් නගරයේ පිහිටි මකරා කන්ද එහෙම නැත්නම් Drachenfels යන නමින් හඳුන්වන කඳුගැටය ගැන යි. එය මීටර 321 පමණ උසකින් පිහිටා තිබෙන්නේ.

කන්ද ඉහලට යන්න ක්‍රම කිහිපයක් තිබෙනවා. එකක් පයින් යන්න හදා තිබෙන පා ගමන් මාර්ගය. එහිම වාහන වලින්ද යා හැකි බව දුටුවා. ඊට අමතරව යුරෝ 12, වගේ ගෙවලා කුඩා කෝච්චියක යන්න හැකියි. අපි ගියේ ආවේ කෝච්චියේ මොකද අපි එක්ක ගියා පොඩි නෝනා බැරි බැරියාව දැම්මොත් අපිට උස්සන් යන්න වෙන නිසා. සාමාන්‍යයෙන් ඇවිදින්න කැමති මම නම් පයින් යමූ කියා යෝජනා කළ ද සියල්ලන් එයට එකඟ වුණේ නෑ.මෙහෙ පොදු ප්‍රවාහන භාවිතයේදී මාස්ක් දැමීම අනිවාර්යයි.

මේ කන්ද හැදිලා තියෙන්නේ ගිනි කන්දක මැග්මා ඝනිභාවනය වෙලා කියලයි කියන්නේ.

ඉහළට යන මාර්ගයෙන් තුනෙන් එකක 1913 දී ඉදිකරන ලද Nibelungenhalle වේ, චිත්‍ර ශිල්පී හර්මන් හෙන්ඩ්‍රිච් අඳින ලද රිචඩ් වැග්නර්ගේ ඔපෙරා වල දර්ශන නිරූපණය සිතුවම් තියෙනවා එහෙත් අපි එහි ගියේ නෑ.

Drachenfels වටා ජනප්‍රවාද කිහිපයක් තියෙනවා, වඩාත් ප්‍රචලිත වන්නේ Siegfried – Nibelungenlied හි වීරයා - කඳුකරයේ ගුහාවක ජීවත් වූ Fafnir මකරව මරා දමා, පසුව අමරණීයවීමට උගේ ලේවලින් ස්නානය කළා කියන එක. එනිසා, කන්ද "ඩ්‍රැගන්ස් රොක්", ඩ්‍රැචෙන්ෆෙල්ස් ලෙස නම් කරා කියලා.

තවත් පුරාවෘත්තයක සිරකරුවන් මකරෙකුට බිලි දුන්නාය කියලත් කියනවා. ඔවුන්ගෙන් එක් කෙනෙක් ක්‍රිස්තියානි කන්‍යාවක් නිසා, ඇය බියෙන් කුඩා කුරුසයක් ඔසවාගෙන ඉන්නකොට කුරුසයට බියෙන් මකරා රයින් ගඟට පැන අතුරුදන් වුණා ලු.

තවත් කතාවක් කියනවා මකරා රයින් ගඟේ වෙඩි බෙහෙත් පිරවූ බෝට්ටුවකට ප්‍රහාරයක් එල්ල කළාම ඒ පිපිරීමෙන් මකරාත් බෝට්ටුවට විනාශ වුණු බව.

කොහොම නමුත් කන්ද මුදුනට නැග්ගම වටේම හොඳට පේනවා. මේ ගැන බලකොටුවක් ඉදිකරලා ඔත්තු බලන්න යොදා ගත් බව ඇසෙනවා. කන්ද උඩ නටබුන් වුණු ගල් බලකොටුවේ ඉතිරි කොටස් තිබෙනවා.

හැබැයි වැඩේ කියන්නේ අමාරුවෙන් නැගලා ඇවිදලා යන්න වගේම ලේසියෙන් ඇවිද යන්න පහසුකම් තියෙනවා. ආබාධ සහිත කෙනෙක්ට වුණත් මේ තැනට රෝද පුටුවේ යන්න පුළුවන්. ඉහළම තැනට යද්දිත් රෝද පුටු යා හැකි ලෙස පඩි පෙළවල් පවා සකස් කර තිබෙනවා දුටුවා. මිනිස්සු ගැන හිතන රටවල් !

©Bodhini Samaratunga

පින්තූර ටික පිටුව වෙනුවෙන් එකලස් කරන ලදී...