කසුරි

I used to collect poems written by Kasuri... since school days..He was one of the talented writers of our times.. May he attain nibbana !

ඊයේ හවස ඉර බහිනා හෝරාවේ

තරුමල් දෙකක් අහසේ පිපිලා තිබුනා

ඒ තරු එළිය යට ගී පද ලියනකොට

වලා පෙළක් විත් අහසම වට කෙරුවා

- තනි තරුවක් ඉඳහිට අඳුරේ පෙනුනා......

මගේ මතක තුල නිරන්තරයෙන් රැඳී තිබෙන කවි පද අතර කරුණාදාස සූරියාරච්චි මහතාගේ මේ කවි සංකල්පනා කොළමේ කවි බොහෝමයක් වෙත්. ගත්කරු, කාව්‍ය රචක, ප්‍රවීන මාධ්‍ය වේදී කරුණාදාස සූරියාරච්චි මහතා විසින් ඉරිදා නිම්නයට ලියූ, කුඩා කවි සංකල්පනා මම එකතු කරන්න පුරුදු වුනේ බොහෝ කුඩා කාලයේ සිට, පස්සෙ කාලෙක පාසැල් මැහුම් පොතේ අලවලා තිබ්බ මැහුම් ටික ඉවත් කරලා, කවි ටික කපලා ඇලෙව්වා. ඒ කවි සියල්ල ලියැවී තිබුනේ ජායාරූපයක් ඇසුරු කොටගෙන, ඒ පොත නිතර කියවන එක හරිම ආශ්වාදජනකයි. හිතන්නට හිත යොමු කරවන අපූර්ව කවි සංකල්පනා රැසක් ඒ අතර තියෙනවා. මේවා එකතුකරලා දුන්නේ ඉරිදා පත්තර නොවරදවා ගන්න නුවර ලොකු අක්කා.... 

ඉරිදා නිම්නයේ වටරවුම, තුලින් එතුමා කළ සමාජ සාධනයද අමතක කර නොහැකිය.

“හදවතට මුවා වෙන මතකයක්” “නෝමා සහ සෝමා”, “වැහි කඳුළ”, “වටරවුම”, “කසුරිගෙ කොලම”, “අපේ කාලයේ කුමාරිකාවකගේ කතාවක්”, “කන්ද පාමුල” සහ “වෑකන්දේ ගීතය” එතුමා විසින් රචිත පොත් සමහරකි.

”ලියන්නා කොච්චර කීවත් කියවන්නා ඒ සියල්ල තේරුම් ගන්නේ නැහැ. ඒක ලියන්නාගේ හෝ කියවන්නා ගේ වරදක් නෙවෙයි. දෙන්නගෙම වරදකුත් නෙමෙයි.

හැම විස්තරයකින්ම පස්සෙ පොඩි පටලැවිල්ලක් මතුවෙනවා. එහෙම පටලැවිල්ලක් ඉතිරි නොකරන සටහනකින් හෝ විස්තරයකින් ඇති වැඩකුත් නැහැ” එතුමා එක තැනක ලියා තිබුණා.

එගොඩ ගොඩේ ඉස්කෝලෙට යන කලට

වතූර කඩිත්තක් හමුවුනි අප සැමට

එගොඩ වෙන්ඩ වෙන මගකුත් නැති කලට

වතුර මැදින් පියමං කෙරුවයි ගොඩට

අකුරු උගෙන් පාසල හැර එන කලට

ගලන ගඟක් හමුවනු ඇත අපෙ පවට

සහතික මිටි ගණන් ඇති මුත් අප සැමට

තරණය කළ හැකිද ඒ ගඟ කිසිම විට

බලවන්තයෝ දත් පෙන්වති එගොඩ සිට

මැට්ටෝ පීන පීනා යති මෙගොඩ සිට

කිසිවිට නොහැක කඳුලැල්ලක පාවෙන්ට

ඒ දණ්ඩක් තනමු අත්වැල් එකතු කොට

~ කසුරි හෙවත් කරුණාදාස සූරියආරච්චි